Илмий даражали ёш олимларимиз сони 2 карра ошиб, 4 минг 357 нафарга етди. Айниқса, фарзандларимиз орасида чет тилларни ўрганишга қизиқиш кескин кучайди.
Ана шу имкониятлардан фойдаланиб, яқинда билимдон ва интилувчан Парвиз Туксанов SAT имтиҳонидан энг юқори – 1 минг 600 балл тўплади. Президентимиз уни ушбу натижа билан қизғин табриклаб, ота-онаси ва ўқитувчиларига миннатдорлик билдирди.
Яна бир ибратли мисол – «Китобсевар миллат» ғояси асосида ёшларда мутолаа маданиятини шакллантириш умуммиллий ҳаракатга айланди. Анъанавий тарзда ўтказилаётган «Ёш китобхон» танловидаги иштирокчилар сони 6 карра ошиб, 3 миллион нафарга етди.
Бир гуруҳ фаол ёшлар томонидан яратилган «Мутолаа» лойиҳаси орқали 1 миллиондан ортиқ ёшлар китобхонлар қаторига кирди.
Ҳозирги тезкор ахборот алмашинуви даврида ёш авлод, айниқса, болажонларимиз учун миллий контентларни яратиш долзарб вазифадир. Бундай контентни боғча ва мактабдаги таълим жараёнларида намойиш этиш орқали янада оммалаштириш зарурлиги таъкидланди.
NKMK AJ va “Navoiyuran” DK OYXTTEM SHKB OYXTTEBo’limi harbiy xizmatchilarining ma`naviyat va ma`rrifat soatiga Uchquduq tumanidagi Jinoyat ishlari bo‘yicha sudi raisi A.Qurbonov, tergov sudyasi Sh.Homidov, Fuqarolik ishlari bo‘yicha sudya A.Jumayev hamda iqtisodiy sudi raisi D.Turdiyevlar ishtirok etdilar.
Tadbirda har bir sudya o`z yo`nalishi bo`yicha ma`umot berib, sud tizimida qabul qilinayotgan yangi qonun hujjatlarining mazmun mohiyati haqida gapirib o`tdi. Jumladan: Uchquduq tuman iqtisodiy sudi raisi D.Turdivev iqtisodiy sudlarga murojaat qilishda O‘zbekiston Respublikasi Iqtisodyi protsessual kodeksiga muvofiq yozma yoki elektron shaklda da’vo arizasi kiritish mumkinligi, da’vo arizasi ushbu Kodeksning 149-moddasida belgilangan shakl va mazmunda bo‘lishi lozimligi, Kodeksning 151-moddasiga binoan da’vo arizasiga ilova qilinishi lozim bo‘lgan hujjatlar to‘g‘risida tushuntirish berib o‘tdi.
Uchquduq tumani tergov sudi sudyasi 2025 yilning 28-yanvar kuni "O‘zbekiston Respublikasining ayrim qonun hujjatlariga shaxsning huquq va erkinliklarini ishonchli himoya qilish kafolatlarini yanada kuchaytirishga qaratilgan o‘zgartirish va qo‘shimchalar kiritish to‘g‘risida”gi O‘RQ-1022-sonli O‘zbekiston Respublikasining Qonuni qaul qilinib, ushbu Qonun tergov faoliyatida shaxsning huquq va erkinliklarini ishonchli himoya qilish kafolatlarini yanada kuchaytirishga xizmat qilishini ma’lum qildi.
Bugungi kunda Jinoyat ishlari bo‘yicha tuman sudida firibgarlik, o‘g‘rilik, tan jarohati yetkazish kabi jinoyatlaming soni oshganligini, bu borada tegishli huquqni muhofaza qiluvchi organlar bilan jinoyatlaming oldini olish bo‘yicha hamkorlik qilinayotganligini ta’kidlab o‘tilib, o‘z dolzarbligini yo‘qotmagan, hamisha eng ko‘p e’tibor va profilaktik chora-tadbirlar o‘tkazilishini talab qiladigan mavzu – korrupsiya va uning inson va jamiyat uchun naqadar ayanchli oqibatlar keltirib chiqarishini, har bir tizimida korrupsion jinoyatlar oshganligi hammamizni tashvishga solishini, korrupsion jinoyatlarni sodir etgan fuqorolar o‘zlariga daxldor bo‘lmagan vazifalarni hal qilib berish maqsadida ushbu qing‘ir yo‘llarga kirishganligini, bunga sabab sifatida esa fuqorolarni bilim saviyasini pastligi, qonunchilikni bilmasliklari, har bir fuqoro yoki mansabdor shaxs avvalo o‘z vazifalarining asosiy maqsadi xalqqa va davlatimizga xizmat qilib, fuqarolarimizning tinchligi va osoyishtaligini ta’minlash emas, balki berilgan imtiyozlardan foydalanib, boylik orttirish, ma’lum bir manfaatlari, ehtiyojlarini qondirishga erishish maqsadida yo’l quyilayotganligini ta’kidlab o’tdi.
Jinoyat yoki qoidabuzarlikning har qanday turi javobsiz qolmasligi, qonun ustuvorligini ta`minlash asosiy vazifa ekanligi, qonun oldida hamma teng ekanligi yana bir bor harbiy xizmatchilarga yetkazildi. Tadbir yakunida harbiylar o`zlarining qiziqtirgan savollariga batafsil javob oldilar.
ShKB OYoXTTEB inspektorlari
Sanjar Baxodirov va Davron Asadov
More...
Олтин ишлаб чиқариш жараёни табиатнинг беқиёс неъматлари ва инсон ақл-заковатининг уйғунлигидан иборат. Бу жараён ҳар бир маъданнинг хусусиятига боғлиқ бўлиб, унинг сири юз йиллар давомида тадқиқ қилинган.
Улкан корхона 3-сонли гидрометаллургия заводида ҳам дастлаб олтин оксидли маъданлар асосида олинган бўлса, кейинчалик маъданлар таркиби сульфидлига алмаштирилди. Бунинг ортидан 2008 йилда 2-цех таркибида флотация цехи янгидан барпо этилди. Бу завод ҳаётида янги саҳифа очди, дейиш мумкин.
Дастлаб, майдалаш цехи таркибида фаолиятини бошлаган бўлса-да, муҳим жараёнлар кечадиган ушбу цех 2010 йилдан алоҳида флотация цехи сифатида ажралиб чиқди. 24 та машиналари билан фаолият бошлаган цех йиллар давомида тараққиёт ва юксалиш йўлини босиб ўтди. Ҳозирда машиналари сони 67 тага етказилган.
Флотация жараёнида Кокпатас, Довғистов ва Омонтойтов конларидан келадиган маъданлар махсус гидроциклонлар ёрдамида флотомашиналарга тушади. Ҳар бир саф флотацияси устидан ўтаётганингизда пастда тинимсиз оқиб турган қора кўпикли сувга кўзингиз тушади.
Фойдали минералларни фойдасиз жинслардан ажратиб олиш учун майдалаш цехидан келган минерал хом ашёга бирламчи ишлов бериш шу цехда амалга оширилади. Майдалаш цехидан бўтана ҳолига келтирилган маҳсулот флотация орқали махсус реагентлар ёрдамида бойитилади.
Флотореагент сифатида кимёвий моддалардан фойдаланилади. Бутилли ксантогенат калий тўпловчи вазифасини бажарса мис купороси – фаоллаштирувчи сифатида ишлатилади. Бир қатор кимёвий ишлов бериш ортидан тайёр бўлган флотоконцентрат флотация орқали 18 куб метрли концентрат қабул қилувчи идишларга йўналтирилади.
Тўрт босиқичли бойитишдан ўтган ҳар бир концентрат энг сўнги босқич қуюқлаштириш бўлимига йўналтирилади. Ҳажми 2516 метр куб келадиган 2 та қуюлтиргич тайёр бойитма махсус чўктирувчи реагент престол ёрдамида тиндирилиб зичлиги оширилади, таркибидаги сув тиндирилади.
Туну кун давом этадиган бойитиш жараёни йиллар давомида бир маромда давом этса-да, ўзига хос ўзгаришлар цех тарихида намоён бўлади. 2008-2010 йиллар оралиғида сульфидли маъданлардан олтин ажратиб олиш 68-70% ни ташкил қилган бўлса, 2010 йил феврал ойида цикллар оралиғидаги флотация (МЦФ-1,2) қуриб ишга туширилиши самарадорликнинг ошишига ҳисса қўшди. Калцийланган сода ва каустик сода эритмасини флотация жараёнига қўшиш натижасида сувнинг юмшоқлиги ошиб, умумий ажратиб олиш кўрсаткичи 80-81% гача кўтарилди.
Флотациянинг биринчи навбатида Швециянинг "Metso minerale" фирмаси РСС-20 ва РСС-70 русумли флотомашина, иккинчи навбатида эса Россиянинг "РИВС" фирмаси РИФ-25 ва РИФ-70 русумли флотомашинаси ўрнатилган. 2017-2018 йилларда унумдорликни ошириш мақсадида РСС-70 флотомашинаси РИФ-70 русумли флотомашинасига алмаштирилди. Реагентлар тақсимотида ҳам ўзгаришлар қилинди.
Жумладан, бутилли ксантогенат калий (БКК) ва оксал (Т-92) реагентларнинг сарфи ўзгармаган ҳолда тақсимлаш нуқталари кўпайтирилди. Пировардида унумдорлик яна бир неча фоизга ошди ва электр энергия истеъмоли ҳам сезиларли даражада камайди.
2024 йил сентябр ойида цикллар оралиғидаги флотация (МЦФ-5) қуриб ишга туширилиши натижасида маъданни қайта ишлаш ҳажми 10-15% га оширилди. Эътирофлиси маҳаллийлаштириш дастури доирасида технологиялар босқичма босқич янгиланиб борилмоқда.
Флотация цехининг муваффақияти ва самарадорлиги унинг фидойи, меҳнатсевар жамоасига ҳам боғлиқ албатта. 107 нафар ишчи-мутахассисдан иборат жамоа Акмал Бахранов бошчилигида ўз олдига қўйган режа-мақсадлар сари ишонч билан одимламоқда. Цех бошлиғининг ўринбосари О. Намозов, цех энергетиги А.Назаров, цех механиги А.Хамзаев, реагентларни тайёрлаш ва дозалаш бўлими бошлиғи Н.Юлдашов каби мутахассислар иш жараёнининг узлуксизлигини таъминлашда катта ҳисса қўшаётир. Электр қурилмаларини таъмирлаш устачилик участкаси устаси А.Ҳикматиллаев, технологик қурилмаларни таъмирлаш бўйича устачилик участкаси устаси М.Нодиров, асбоблар ва аппаратураларни таъмирлаш бўйича устачилик участкаси устаси В.Тошниёзов сингари мутахассислар эса техник хизмат кўрсатиш ҳамда таъмирлаш ишларини сидқидилдан бажармоқдалар.
Бевосита иш жараёнида флотаторлар Б.Дусмурадов, О.Боймирзаев, дозалаш аппаратчиси М.Тошев, электромонтёрлар С.Беков, Х.Джуманкулов, таъмирловчи чилангар М.Хаджаев, назорат ўлчов асбоблари ва автоматика бўйича чилангар Б.Худоймуродов, электрогазпайвандловчи М.Эгамбер-диевлар ўз фидоийлиги билан ажралиб туради.
Мухтасар айтганда, флотация цехида меҳнат қилаётган аҳил жамоанинг касбий маҳорати юқори шу боис бу ерда режа-топшириқ ортиғи билан уддаланади.
Феруза ЯНДАШОВА,
махсус мухбиримиз.
Онамнинг соғинчига ўзларининг дийдорини кўрмаганимча таскин йўқ эди. Олдиларига бориб келганимдан сўнг, кўнглимнинг чанқоғи бир ойга босилар, кейин яна кўргим келаверарди: “Узоқ гаплашиб ўтирмасам ҳам майли, ўзларини бир кўрсам, ёнгиналаридан овозларини эшитсам, етарли!”. Шу боис менга ҳар хил тўй-маросимлар, туғилган куну йиғинларга боришнинг қизиғи йўқ эди. Турмуш ўртоғимдан биргина илтимосим – “Онамни кўриб келишим учун хурсандчилик билан розилик берсалар бас!”. Рухсат теккач, ёзнинг саратонидан қишнинг қаҳратонидан қўрқмай, йўл азобидан зарра ҳадигим бўлмай отланардим.
Эсимда бундан 30 йилча олдин “Учқудуқ-Бухоро” йўналишидаги автобуснинг жўнаш пайтига етиб борувдим. Байрам арафаси эди, бекат тўла йўловчи. Беш яшар қизимни бағримга босиб, бўш жойнинг йўқлигидан автобус йўлагида кетганман. Аммо Бухорога етгунча сал кам вақт 8 соатлик йўлни қалбим тўла ҳаяжон, қувонч билан ўтказганим бот-бот ёдимга тушаверади.
Дийдорлашув пайтларидаги онамнинг бахтиёр чеҳрасини таърифлаш қийин. Кўпинча уйимизга бехосдан (ахир, у пайтларда телефон йўқ эди-да) кириб борардим. Дарвозадан уйга киришим билан онам яшнаб кетардилар. Овозларида қалбимни эритиб юборадиган меҳр товланиб пешвоз чиқардилар.
-Бугун қандай яхши кун экан! Қайси шамоллар учирди, болам? Бу нурли сиймога шунчалар азиз, суюкли эканимни неча –нечанчи бор ҳис этсам-да, ҳар гал томоғимни куйдириб, кўзларимга тўладиган ёшларни ютиш, яшириш учун гапни ҳазилга бурардим: -Қизилқумнинг аёвсиз шамоллари учирди, мени!.
– Ҳа-я, гап улардилар онам. – Болажонимни келтирган ўша Қизилқумнинг аёвсиз шамолларидан ўзим айналай...
Энди уринишларим бекор... Бу дунёдан эрта кетган дадамнинг ўринларига ҳам ота ҳам она бўлиб бизни ўкситмай катта қилган онажонимнинг ихчам жуссасини бағримга босиб, бошимни елкасига қўйган-ча, кўзимни кафтимни орқаси билан тез-тез сидирардим.
Кейин чекка-чекка токчалардан, қутичаю тахмондаги кўрпалар орасидан менга атаб қўйган нарсаларни дастурхонга тўкардилар. -Чўлда яшасак-да, биздаям ҳамма нарса бор, нимага ўзингиз емай асраб қўясиз?! -Янганг бозордан олиб келган майиздан сенга ҳам олиб қўювдим. Ол, есанг-чи, - дейди онам чой қуйиб узатаркан.
...Қиш хаёлкаш. Унинг ўйчанлиги “юқиб”, майдалаб ёғаётган қорга термулган-ча, яна онамни эсладим. Соғиндим! Хаёлга нималар келмайди. “Қанийди, шу изғиринли қорли кунда минг машаққат билан йўлларни босиб, автобус йўлагида ўтириб бўлса-да, онамнинг дийдорини кўриш мумкин бўлса! Иккиланмай, ўйланмай, тўхтамай қувончларимдан қанот ясаб йўлга чиқардим”!...
Ҳа, хаёлкаш қиш элагида қорни эмас, аслида дийдорга, эзгуликка, соғинчга ташна умримизнинг ғанимат онларини элаётгандай.
Яна хазонларга қайтаман ёлғиз,
Яна дард баргига кўмилар бу из,
Яна боғлар сенсиз ҳувиллар она,
Рутуб маҳзанида мубҳам кумуш қиш!
Райҳон ҚОДИРОВА, журналист.
Endi yilda ikki marta hududlarda olimpiya sport turlari boʻyicha “Yangi Oʻzbekiston Olimpiya choʻqqilari” musobaqalarini oʻtkazish yoʻlga qoʻyiladi. Bunda tuman va viloyat sovrindorlarini hokimlar ragʻbatlantirib boradi.
Viloyat bosqichi gʻoliblari har yili 10-20-dekabr kunlari Olimpiya shaharchasida oʻtkaziladigan Prezident olimpiadasida ishtirok etadi.
Musobaqa gʻoliblari uy, avtomobil kabi qimmatbaho sovgʻalar bilan taqdirlanadi. Birinchi va ikkinchi oʻrinni olgan sportchilar esa Respublika olimpiya va paralimpiya markaziga qabul qilinadi va 1- va 2-kurs oʻquvchilariga stipendiya toʻlab boriladi.
Bundan tashqari, endilikda sportchilarni yetishtirib chiqargan birinchi murabbiylarga sportchilar va terma jamoa murabbiylari uchun koʻzda tutilgan ragʻbatning 10 foizgacha qismi mukofot sifatida beriladi.
Қизилқум табиати ўзгача: ёз жазирамасида қанот қоққан қушнинг пати куйгудек, қишининг аёзида қолган жонзотнинг суяги бир умр илимайди. Саҳро бу ерда яшовчи одам боласи ва чўл набототини обдон синовдан ўтказади. Шунинг учун ҳам ушбу чўл инжиқликлари аро меҳнат қилаётган азаматларни ҳеч муболағасиз қаҳрамонлар, дейиш мумкин.
Мен бугун “Довғизтов” конида жамиятимиздаги кўплар ибрат олгулик, бир осмон остида яшаб, бир ҳаводан нафас олаётган замондошларига фидойилик намунаси бўлгулик замон қаҳрамонларини учратдим.
Яқин кунларда “Довғизтов” конида саноатга тадбиқ этилиши кутилаётган даврий оқим технологияси комплекси ишга туширилади. Ана шу баҳона Учқудуқдан ....км узоқликда жойлашган “Довғизтов” конига йўл олдик.
...Қуёш ҳали кўрпасидан бош кўтармаган, туни билан хизматини ўтаган ой уйқусираб, эринибгина хира кумуш нур элар, олис-олисларда қизариб-бўзарган янги тонг тарихга айланаётган туннинг ўрнини йиғиш билан овора. Чамаси икки ярим соатликлик масофа. Одатда, йўллар менга илҳом беради, “Юрган – дарё, ўтирган – бўйра” мақолининг мушоҳадасини англайман. Шу вақтда уловда сенга ҳамрох бўлганнинг сукути бисёр бўлсаю сен эса мазза қилиб йўл билан гурунглашсанг! Ахир, минглаб одамларни кўрган, кутиб-кузатган бу йўлларда ҳикмату афсоналар мил-мил.
Довғизтовга бораверсангиз йўлнинг чап томонида “Девқизтоғ” бўй кўрсатаверади: бошида кўзларингиз бу оддий қояларнинг маъносини тушунмайди. Бироқ, қозоқ халқининг афсоналари хаёлингиздан ўтиши билан кўз олдингизда катта-кичик, майда-чуйда қоялар уйқуда ётган улкан алпкелбат қиз ҳайбатини “ясайди”. Уйқудаги гўзал! “Воажаб! Тоғлар ҳам одамлардек бир-бирига ўхшаш бўларкан-да?!”, дея ҳайратланасиз.
Бир неча йиллар олдин Наманганнинг Қирғизистон билан чегарадош тоғларида ер сатҳидан анча баландликда, юксакда мана шундай “уйқудаги гўзал”ни кўргандим. Табиатга беқиёс ва мукаммал сайқал берган Эгам гул водий ва саҳро “гўзаллари”ни ҳам эгиз қилиб яратган бўлса ажаб, эмас! Бугунги, биз йўл олган Довғизтов ҳудуди (поселка) га яқин жойда аллазамонлар туғилган “девқиз” ўз овулидагилардан қаттиқ ранжиб саҳрога бош олиб чиқиб кетган ва ана шу кенгликларда осмонга тикилганича мангу уйқуга кетган экан.
Абадий оромдаги улкан қиз асрлар оша тоғ-тошга айланиб, у уйқуга кетган ҳудуд Дов (каттакон), ғиз (қиз), тов (тоғи), деб атала бошланган. “Довғизтов” нинг тарихи шунақа эмиш. Ичи тўла сир дунёнинг қизиқ асотири-да бу ҳам! Автоулов йўлини давом эттираркан, менга “девқиз” эртагини сўйлаган ўша майда-чуйда қоялар кўздан ғойиб бўлади. Мен тарих билан хайрлашиб, бугунги давр қаҳрамонларининг афсоналар бўлгулик илму ирфонлари ва меҳнат-шижоатларини ёзишга шошиламан.
Халқ кўз тиккан ризқнинг залвори ва масъулияти оғир бўлади. Бу йўлда эришилган муваффақият завқига берилиб, зиммага юкланган вазифага бепарволик ёхуд машаққатли жараёнларда масъулиятни унутиш ғоят хатарли. Шу билан бирга, шиддат билан шошаётган давр илмидан орқада қолиш ҳам ярамайди. Бугунги давр қаҳрамони ё замон билан ҳамнафас бўлиши ёки даврдан ўзиб ҳаракатланиши зарур.
Шимолий кон бошқармасида ана шундай замон қаҳрамонлари меҳнат қиладилар. “Довғизтов” конида ишга туширилган даврий узлуксиз технология комплекси илм-шижоатли, довюрак, ўз касбини астойдил севувчи мутахассис ходимларнинг меҳнатлари маҳсули сифатида қад ростлади.
Шимолий кон бошқармасида биринчи марта қурилган ушбу мажмуа “Довғизтов” конида кон техникалари орқали тоғ жинсларини ташиш масофасини қисқартириш ва ёқилғи-мой маҳсулотлари харажатларини камайтириш ҳамда меҳнат унумдорлигини оширишга хизмат қилади. Ана шу жиҳатдан олиб қараганда тоғ-кон жинсларини конвеер линиялари орқали ташиш энг қулай ва тежамкор воситадир. Узунлиги 1900 м, эни 2 м бўлган даврий оқим технологиясини барпо этишда 5000 тн металлоконструкция ишлатилди.
Ўтган 2024 йилда “Довғизтов” конида йиллик режа 115,5 фоизга бажарилган бўлса, жорий йилда 41,1 млн. кубметр тоғ жинсларини қазиб олиш режалаштирилган. Бугун кон-металлургия тарихига муҳрланаётган ана шундай улуғвор ишларнинг самарасидан умидлар катта.
Дунё миқёсида ҳар бир соҳада хусусан кон-металлургия саноатида ҳам кескин рақобат кетмоқда. Шу боис, ишлаб чиқаришда ўз имкониятларини ярата олаётганларгина айни вақтдаги шиддатли эврилишлар муҳитида юксак мавқеини сақлаб қолади.
Даврий оқим технологияси мажмуаси ҳам зукко мутахассисларнинг илмий-технологик ғоялари маҳсулидир. Ушбу комплекснинг бунёд этилишида Навоий машинасозлик заводи фидойилари, Зарафшон қурилиш бошқармаси меҳнаткашлари ва Шимолий кон бошқармасининг жонкуяр ходимлари ишчанлик ва шижоат билан меҳнат қилиб қудратли комбинатнинг ҳар ишда бирдам ва илғор эканини кўрсатдилар.
Мажмуанинг очилиш маросими жуда шукуҳли ва файзли ўтди. Уч-тўрт кун олдин келганимда ватан иқтисодиёти йўлидаги ҳар қандай меҳнат ва машаққатни шараф билиб астойдил ишга киришган, чўл шамоли юзларини қорайтирган мутахассислар ва ишчиларнинг бугун елкаларидан тоғ ағдарилгандек!.
Евгений Серков, Ботиржон Ишматов, Ойбек Асадовдек оқ-сариқдан келган йигитларнинг юзини олган қуёш бугун уларнинг юзида порлаётгандек. Уларнинг табиат инжиқликларию куннинг қайси маҳали бўлишидан қатъий назар касбларига садоқат билан қилган хизматлари ушбу мажмуанинг тез фурсатларда ишга туширилишига сабаб бўлди. Бу эса, гигант корхонанинг ҳар бир ходими республикамиз иқтисодий қудратини мустаҳкамлаш йўлида шай ва уйғоқ эканига яна бир далолатдир.
Улкан технологик мажмуага қараб ўрта асрларда соҳибқирон Темур бобомизнинг: “Қудратимизга шубҳа қилсангиз, биз қурдирган биноларга боқинг!”, деган сўзлари нақадар тўғрилигини тушуниш мумкин. Ҳақиқатан ҳам мазкур комплекс бугунги асримизда яшаётган юзлаб Темурийларнинг куч-қудрати ифодасидир.
Нилуфар Муйдинова,
ШКБ Ахборот ва маънавият-маърифат гуруҳи раҳбари.
