LOTIN-КИРИЛЛ

   «Үшқұдық» газетінің ең алғашқы саны 1989 жылы желтоқсан айында «Достық-Дружба» атымен қазақ және орыс тілінде шыға бастады. Бірінші редактор – Молдабек Сейітназаров бастаған ұжым бірталай тілшілерді ауданымызға танытты. 1999 жылдан бастап басылым өзбек, қазақ, орыс тілдерінде жарыққа шыға бастады. Молдабек ағайдан кейінгі лекті Баянбек Ақниязов, Роза Алдашова, Озода Эргашева, Шырын Каримбаева, Райхан Қадірова, Мөлдір Бүркітбаева, Феруза Яндашовалар жалғастырды.
    2004 жылда газетке «Үшқұдық» аты берілді. Тұңғыш сандары айына екі кейде үш мәрте шыққан болса, қазіргі күнде айына үзілмей 3 мәрте А3 форматпен түрлі-түсті реңде 6000-ға жақын тиражда жарық көріп жатыр. Оқырмандар газеттің электронды форматын www.uchquduq-gazeta.uz веб-сайты арқылы да көре алады. Мазмұны жағынан үлкен де, кіші де, жас та, кәрі де оқитын «Үшқұдық» газетіне кез келген жастағы адам өзінің мақаласын, шығармашылық туындысын шығара алады.
   Бүгінде басылымның біршама жетіскен жетістіктері бар. «Жылдың ең белсенді журналисті», «Мықты отбасы – қоғам тірегі» және «БАҚ жарияланған үздік материал» республикалық байқауларында жүлделі орындарды иеленген. Өзбекстан Республикасы Жоғары Мәжілісі жанындағы беймемлекет бейкоммерциялық ұйымдарды қолдап-қуаттау қоғамдық қоры тарапынан екі мәрте грантқа иесі атанды. Науайы кен-металлургия комбинаты солтүстік кен басқармасының 55 жылдығына арналған «Үшқұдық-Қызылқұм - жауһары» кітап-альбомы, “Үшқұдық - шөлдегі бақша”альманахының бірінші және екінші томдарында өлке тарихын, еңбекшіл азаматтардың шығармашылық табыстарын замандастар мен келешек ұрпаққа жеткізуде маңызы зор.
Ауданның құрылғанына 40 жыл толуына орай «Үшқұдық ауданы: кеше және бүгін» кітап-альбомы жарық көрді. Кітапта өлкенің тарихы, жер-су атауларының шығу тарихы, өңірдегі киелі тарихи орындар, Қызылқұм кеңістігінде жасырылған сырлар, бүгінгі әлеуметтік-экономикалық тыныс-тіршілік, жүзеге асырылып жатқан жедел реформалар туралы сөз етілген. Бұл кітап-альбом алғашқы ресми дереккөз ретінде редакцияның шығармашылық ұжымымен баспаға дайындалып, өзбек және ағылшын тілдерінде 1500 данамен басылғанын ұйғара кеткен маңызды.
    Алғаш күннен-ақ өз оқырмандарының жүрегінен орын алған «Үшқұдық» газеті жарыққа шыққанша биыл 35 жыл толып отыр. Осы жылдар ішінде басылымның аға буыны ауысып, құрамы жаңа жастармен толықты. Жастар құрамы жаңарған сайын, газеттің өзі кеңейіп, сапасы көтеріліп, шығармашылығы жыл сайын артып, таралымы көбейіп, мазмұны да, айтар ойы да, беделі де көтеріліп келеді.
   -«Біздің «Үшқұдық» газеті аймақ жастарын танытуда, өз ісінің үздіктерін насихаттауда, үлгі-өнеге етуде. Өз жұмысын 100 пайыз орындап отырған газет деп сеніммен айта аламын. Бүгінгі заманауи гаджеттер газеттердің орнын басып келе жатыр деген күннің өзінде «Үшқұдық»газетіндегі кейбір танымдық мәліметтерді, мөлтек әңгімелерді газеттің өзінен ғана тұшынып оқуға болатынын байқаймын. Сондықтан жарық көргеніне 35 жыл толып отырған басылымының болашағы жарқын, оқырманы көп болсын деген тілек білдіремін», - дейді Райхан Қадірова.
    «Үшқұдық» газетінің 35 жылдығына орай еңбек жолын осы басылымнан бастап, бүгінде қолына қалам ұстаған бізге ұқсаған жастар үшін жақсы мектеп.
«Үшқұдық» газетіне – 35 жыл. Отыз бес жылдық белес. Әлі де талай шығармашылық белестерді бағындырып, асулардан асу қажет! Жаңашылдыққа ұмтылған басылымның оқырманы жылдан-жылға көбейе беретініне сенімім мол.


Мөлдір БҮРКІТБАЕВА,
тілші.

    Маънавият – миллатни бирлаштирувчи энг муҳим қадрият. Бу маънавий бойликни авлодлардан авлодларга етказишда оммавий ахборот воситаларининг ўрни беқиёс. Айниқса, маҳаллий нашрлар ҳудуднинг тарихи, маданияти ва бугунги ҳаётини акс эттирган ҳолда, ўзига хос маънавий кўзгу вазифасини бажариб келмоқдаки, буни бугун ўзининг ўттиз беш йиллигини нишонлаётган "Учқудуқ" газетаси мисолида ҳам кўриш мумкин.
Газета ўз фаолиятини 1989 йил декабрь ойида "Достық - Дружба" номи билан бошлаган. Дастлаб, қозоқ ва рус тилларида чоп этилган газета 1999 йилдан бошлаб ўзбек, қозоқ ва рус тилларида нашр юзини кўрди. Газетанинг биринчи муҳаррири Молдабек Сейтназаровдир. Турли йилларда Баянбек Ақниязов, Роза Алдашева, Озода Эргашева, Ширин Каримбаева, Райҳон Қодирова, Молдир Буркитбаева ва Феруза Яндашовалар газетага муҳаррирлик қилишди.
2004 йилдан "Учқудуқ" номи билан чоп этилаётган газета қатор йиллар иқтисодий қийинчиликларни ҳам кечирди. Аввалига икки ойда бир ёки икки марта нашр этилган газетанинг бугун даврийлиги ошган. Ҳар ўн кунда мунтазам 6000 нусхадан чоп этилмоқда, айниқса нашрнинг таҳририят ҳисобидан ўз вақтида обуначилар қўлига етказилиши таҳсинга сазовор, албатта.
Электрон нашри эса www.uchquduq-gazeta.uz сайти орқали муштарийларга ҳавола этилмоқда.
Айниқса, сўнгги йилларда "Учқудуқ" газетаси таҳририяти ижодий ходимлари бир қанча ютуқларни қўлга киритди. Жумладан, "Йилнинг энг фаол журналисти", “Мустаҳкам оила – жамият таянчи” ҳамда “ОАВ эълон қилинган энг яхши материал” республика танловларида фахрли ўринларни қўлга киритган. Олий Мажлиси ҳузуридаги ННТларини ва фуқаролик жамиятининг бошқа институтларини қўллаб-қувватлаш жамоат Фонди грант лойиҳаси доирасида икки марта совриндор бўлди.
    Шунингдек, таҳририят ижодий ходимлари томонидан нашрга тайёрланган "Учқудуқ Қизилқум жавоҳири" китоб-альбоми, "Учқудуқ саҳродаги бўстон" альманахини биринчи ва иккинчи жилди ҳудуд тарихи ва меҳнаткаш инсонларининг ижодий ютуқларини замондошлар ва келажак авлодларга етказишда муҳим аҳамият касб этади, албатта.
   “Учқудуқ тумани: кеча ва бугун” китоб-альбоми эса туман ташкил этилганлигининг 40 йиллиги муносабати билан чоп этилган. Китобда ҳудуд тарихи, жой номларининг келиб чиқиши, ҳудуддаги муқаддас қадамжолар, Қизилқум кенгликларида яширинган сиру-синоат, айни дамдаги ижтимоий-иқтисодий ҳаёт ва амалга оширилаётган жадал ислоҳатлар хусусида сўз боради.
Мазкур китоб-альбом биринчи расмий манба сифатида таҳририят ижодий ходимлари томонидан нашрга тайёрланиб, 1500 нусхада ўзбек ва инглиз тилларида чоп этилгани аҳамиятлидир.
    Ҳақиқатдан ҳам “Учқудуқ” газетаси ҳудуднинг тарихи, бугунги ҳаёти ва истиқболи ҳақида ҳикоя қилувчи ўзига хос кўзгу бўлиб, нафақат ахборот тарқатиш, балки маънавий-тарбиявий вазифани ҳам, ҳудудда яшаб меҳнат қилаётган эл ифтихорларини кенг оммага таништиришда ҳам ўз ўрни ўз нуфузига эга нашр.
Мухтасар айтганда оппоқ қоғоз юзига қалам учидан тўкилаётган мисраларда ҳар бир ижодкорнинг қалб қўри, сиз муштарийларга бўлган меҳри, ҳикоя қилаётган қаҳрамонларига бўлган эътибори мужассам!
   Бугун таҳририятда меҳнат қилаётган ижодий жамоага кичкина қаламнинг оғир юкини кўтариб, масъулиятли вазифада ишлаётган ҳамкасбларга мустаҳкам соғлик, оилаларига тинчлик-хотиржамлик тилаймиз!

 

   Учқудуқ туман ҳокимлиги мажлислар залида халқ депутатлари туман кенгашининг навбатдаги 4-сессияси бўлиб ўтди. Сессияда туман кенгаши депутатлари, ҳуқуқ-тартибот идоралари раҳбарлари, мажлис кун тартибида муҳокама қилинган масалаларга алоқадор ташкилот, корхона ва муассасалар мутасаддилари ҳамда ОАВ вакиллари иштирок этди.
   Сессия ишини халқ депутатлари Учқудуқ туман кенгаши котибият мудири Мубина Камолова бошқариб борди.
Кун тартибидаги биринчи масала юзасидан туман ҳокими У.Елмуратов Ўзбекистон Республикаси Президентининг 2024 йил 12 декабрдаги “Навоий вилоятини ижтимоий-иқтисодий ривожлантириш бўйича қўшимча чора-тадбирлар тўғрисида”ги ПҚ:-430-сонли қарори ижроси хақида маълумот бериб ўтди.
Депутатлар томонидан кун тартибида Туман маҳаллий бюджетининг 2024 йилдаги ижроси, Туманнинг 2025 йилги маҳаллий бюджети параметрларини тасдиқлаш тўғрисида туман иқтисодиёт ва молия бўлими бошлиғи Ж.Бобомуродовнинг, Учқудуқ тумани бўйича 2025 йил учун юридик ва жисмоний шахсларнинг ер солиғи ставкаларини ҳамда мол-мулк солиғини ҳисоблашда қўлланиладиган энг кам қийматни тасдиқлаш тўғрисида туман ДСИ бошлиғи А.Усмоновнинг, Ўзбекистон Республикаси Президентининг 2024 йил 21 февралдаги “Ўзбекистон-2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги ПФ-37-сонли Фармони ижроси тўғрисида туман хокими ўринбосари Н.Муратовнинг, Аёллар муаммоларини тизимли равишда ҳал этиш, уларни ижтимоий қўллаб-қувватлаш борасида амалга оширилаётган ишлар ҳамда “Аёллар дафтари” рўйхатидан чиқариш тўғрисида туман хокими ўринбосари, оила ва хотин –қизлар бўлими бошлиғи Н.Нажмиддинова ҳамда 2024 йилда туман камбағалликни қисқартириш ва бандликка кўмаклашиш бўлими томонидан амалга оширилган ишлар тўғрисида туман камбағалликни қисқартириш ва бандликка кўмаклашиш бўлими бошлиғи И.Расуловнинг ахборотларини тингладилар.

    Халқ депутатлари Учқудуқ туман кенгашининг навбатдаги 4-сессияси кун тартибида муҳокама қилинган масалалар юзасидан тегишли қарорлар қабул қилинди ва ижрога қаратилди.

УЧҚУДУҚ ТУМАН ҲОКИМЛИГИ АХБОРОТ ХИЗМАТИ.

       Учқудуқ туман ҳокими Елмуратов Учқун Файзуллаевичнинг Янги йил табриги

    Ассалому алайкум азиз ва қадрли юртдошлар!

    Ҳурматли учқудуқликлар!

     Шу кунларда барчамиз ҳаётимизда ўчмас из қолдирган 2024 йил билан хайрлашиб, эзгу қадамлар ила кириб келаётган 2025 йилни кўтаринки кайфият ва шоду хуррамлик билан қарши олмоқдамиз.

     Шу қувончли лаҳзаларда Сиз азизларни Янги йил байрами билан чин қалбимдан самимий муборакбод этаман!

Барчангизга мустаҳкам соғлик, оилавий бахт, тинчлик ва тотувлик тилайман!

Албатта, 2024 йил туманимиз ҳаётининг барча соҳаларида сезиларли ўсиш ва аҳамиятли натижалар билан якунланмоқда. Бунинг замирида албатта сиз, мард ва танти тумандошларимизнинг фидокорона меҳнати, эзгу интилишлари мужассам.

Қадрли тумандошлар!

      Ҳаммамиз эзгу орзу-умидлар билан Янги — 2025 йилга қадам қўйдик. Ўйлайманки, Сиз азизларнинг саъй-ҳаракатларингиз, қўллаб-қувватлашингиз, энг муҳими — юксак ишончингиз билан кириб келган Янги йилда ҳам ўтган йилдагидан кўра салмоқлироқ натижаларга эришамиз. Менинг ниятим, тилагим шуки, ҳар бир оила, ҳар бир инсон мурод мақсадига етсин!
Барчангизга яна бир бор мустаҳкам соғлик, оилавий хотиржамлик, фарзандлар, набиралар бахту камолини кўриш насиб этсин!

  Янги — 2025 йилнинг қадами жонажон Ўзбекистонимизга қутлуғ ва баракали келсин!

Юртимиз тинч, халқимиз омон бўлсин!

Янги йил барчамизга муборак бўлсин, азизлар!

НАИМ АМОНОВ,

Шимолий кон бошқармаси директори.

Кўп миллатли ва аҳил жамоа билан яна бир шукуҳли кунлар арафасида турибмиз. Янги – 2025 йилга улкан режа ва мақсадлар, илм ва шижоат билан қизғин тайёргарлик кўрилмоқда. Якунланаётган йилда Шимолий кон бошқармасининг матонатли ва ишчан ходимлари билан елкама-елка, синовларни ғолибона енгиб, эришилган зафарлардан кўнглимизда хурсандчилик ҳукмрон.

Бош директоримиз томонидан жамоамизга катта ишонч билан берилган кўрсаткичларни муддатидан олдин бажаришга эришдик – Ватан олдидаги бурчимизнинг ижросидан юзимиз ёруғ! Бу ёрқинлик бизни қувонтириш билан бирга, фаолиятимизни янада теранроқ сарҳисоб қилиб, масъулият ва жавобгарлик ҳисси билан яшамоқ ва меҳнат қилмоққа ҳамда янги-янги режалар сари музаффар илдамламоққа ундайди.

Бу борада, бизга Президентимизнинг кенг қамровли яратувчанлик ислоҳоти илҳом, комбинат раҳбариятининг ҳар жиҳатдан қўллаб-қувватлови қанот бўлаётганини таъкидлаш зарур. Зеро, кузатаётган йилдаги ғалабалар ва улкан довонни ўтишдаги ғайрат замирида ҳам комбинат раҳбариятининг юксак ишончи ва ғамхўрлиги бор, албатта!.

2024 йил Шимолий кон бошқармаси учун ғоят аҳамиятли, баракали ва синовли йил бўлди, десам муболаға бўлмас. Саноатга тадбиқ этилган замонавий технологиялар, самарали Инвестицион лойиҳалар ва соҳа мутахассисларининг стратегик ишланмалари амалиётда ўзини оқлади. Залворли меҳнатлар натижадорлигини кўрсатди.

Бу борада сўз кетганда,  аввало  ҳурматли  Президентимизнинг ҳаётбахш сиёсатидан куч олиб, инсон қадри тамойили асосида ишлар олиб борилаётганлигини айтиш жоиз.  Зеро, ишчи-ходимлар меҳнати учун зарур шарт-шароит ва муҳитни яратмай, тобора шиддат билан шошаётган давр ва кучли рақобат бозори руҳига мос ҳаракатланмай – техник ва технологик қудратни замонасоз ҳолатга шайламай туриб, натижа ёхуд самара кутиш мутлақо хато бўларди! Шунинг учун ҳам мақсад қилинган улкан режаларнинг муқаддимасини ишчи-ходимлар учун қулай меҳнат шароитларини яратишдан бошланган.

БУНЁДКОРЛИК ЙЎЛИДАН ОҒИШМАЙ

Бу хайрли ишлар Бош директор томонидан тасдиқланган “Манзилли қурилишлар дастури”га мувофиқ бажарилди. Ушбу дастурга асосан, 2024-йилда кон бошқармасидаги  қурилиш-таъмирлаш ишлари учун 1 572 803.9 млрд. сўм маблағ сарфланди.

Бунёдкорлик жараёнлари янги ишлаб чиқариш қувватларини фойдаланишга тадбиқ этиш ҳаракатлари билан параллел тарзда олиб борилди. Олтмиш беш йил олдин қурилган эски бинода жойлашган марказий физика-кимёвий лабораторияси ҳамда тармоқлар ва подстанциялар цехи 2024 йилда замонавий ускуналарга эга муҳташам объектга кўчиб ўтди. Кузатаётган йилимиз гидрометаллургия жараёнларида қўлланиладиган микроорганизмларнинг экологик шароитларга (pH) ҳарорат оксидланиш-қайтарилиш салоҳияти мослашувчанлигини таҳлил қилувчи, комбинат тарихидаги биринчи биолаборатория ишга туширилди.

3-сонли гидрометаллургия заводи учун самарали ўсиш даври бўлган  Бош директор ташаббуси билан ишга туширилган тегирмонлар сони жорий йилнинг июл ойида яна биттага кўпайди. Ушбу 7-тегирмон заводда йилига яна бир миллион тонна олтин таркибли маъданни қайта ишлаш қувватини берувчи қудратли технология экани билан аҳамиятлидир. ““Кокпатас ва Даугизтау олтин конларида маъдан қазиб олиш. III-навбат” инвестиция лойиҳаси бўйича заводдаги флотация цехи учун қўшимча флотомашиналар қурилди ва  фойдаланишга топширилди.

7-тегирмон блогининг ишга туширилиши доирасида флотация, биооксидлаш, фильтрлаш, қуритиш ва куйдириш цехларининг кенгайтирилиши назарда тутилган бўлиб,  айни вақтда биооксидлаш цехининг 9, 10-модулларини қуриш ишлари жадал суръатларда олиб борилмоқда. “Даугизтау” конида “Даугизтау кони II навбат ДУТ мажмуасининг қурилиши” ишчи лойиҳасининг қурилиш-монтаж ишлари йил якунига қадар тугатилиши кўзда тутилилган.

Бундан ташқари, заводдаги мавжуд маиший хизмат кўрсатувчи бинолар қаторида яна бир 900 ўринли иншоотнинг ишга туширилиши режалаштирилган бўлиб, ҳозирда бу ерда реконструкция ишлари давом эттирилмоқда. Шу билан бирга, назорат-ўлчов асбоблари ва автоматика воситалари марказий лабораториясида замонавий ўқув-синф хоналари ташкил этиш учун олиб борилаётган қурилиш-таъмирлаш ишлари ҳам авж палласида.

Улуғвор режаларимизнинг яна бир ижроси мустақилликнинг шонли ўттиз уч йиллик шодиёнаси арафасидаги байрам тантаналарига уйғунлашиб кетди. “Шарқий” конида 250 ўринли барча қулайликларга эга замонавий ошхона ва “Даугизтау”  конида бир неча тармоқлар фаолиятини ўзида жамлаган маъмурий комплекс биноси барпо этилди ва фойдаланишга топширилди.

Кон ишларини тезкор бошқариш мақсадида “Шарқий” ва “Даугизтау” конларидаги диспетчерлик хоналарида замон талабига мос равишда ўрнатилган замонавий компютерлар ва интерактив дисплейлар ишлаб чиқаришга тадбиқ этилган. Ушбу ишлар баробарида қисқа фурсатларда “Ажибугут” кони ишга туширилишига ҳам эришилди.

Бироз муддат аввалги саҳро қиёфаси ўзгариб, чўлнинг ўртасида барча қулайликларга эга саноат инфратузилмаси яратилди. Ходимларнинг яшаш  ва ишлашлари  учун зарур бўлган шароитлар муҳайё қилинди.

 Бундан ташқари, ноқулай меҳнат шароитларида ишлаётган ходимлар филтрланган тоза ичимлик суви билан таъминланди. Бўлинмалардаги топшириқ бериш, овқатланиш хоналарига ҳамда кон механизмлари ва автоағдаргичларга кондиционерлар ўрнатилди.

ЗАМОНАВИЙ КОРХОНАНИНГ ЗАМОНАВИЙ ТЕХНИКАЛАРИ

Сир эмаски, бозор иқтисодиёти улкан рақобат атмосфераси ва дунё саноати тажрибаси келажакни мустаҳкам қуришни ўйлаган ҳар бир раҳбар ва мутахассисдан замон билан ҳамнафасликда, шиддат билан юксалиш йўлидан боришликни тақозо этади. Ана шуларни инобатга олган ҳолда  тажрибали мутахассислар, илм-салоҳияти юқори илғор ёшлар ва замонавий техникаларнинг қудратига таяниб, саноат майдонларидаги ишлар тизимли ташкил этилмоқда. Ўсиш кўрсаткичларини янгилаш учун азму шижоат ва пешқадам технологиялар билан захира  тўпланган.

2024 йил давомида транспорт паркига 12 дона катта ҳажмдаги Komatsu HD-785-7R русумли кон автоағдаргичлари, 2 дона Liebherr PR-776 русумли булдозер, 3 дона ZL-50 олд юклагич, 2 дона CPCD-25, 2 дона CPCD-20, 1 дона Manitou русумли юклагичлар ва 1 дона WZ 30-25 русумли эксаковатор-юклагич келтирилган. 2024 йил I - чорагида ташилган тоғ массасининг кунлик ҳажми 193,0 минг.м3, II - чоракда 196,8 минг.м3,  III - чоракда 205,5 минг.м3, октябрь ойида эса 214,4 минг.м3ни ташкил этди.

Ушбу рақамларни 2023 йилдаги кунлик ташилган тоғ массасининг ҳажми билан таққосласак, шу йил октябрдаги кунлик ташилган тоғ массасининг ҳажми 17,0%га ошганини кўриш мумкин.

Жорий йилда тоғ жинсини қазиб олиш ҳажми кон ишларини ривожлантириш режасига нисбатан 108,7% бажарилди ва ўтган йилнинг мос даврига нисбатан 108,5% ўсиш суръати таъминланди.

Сулфидли маъдан қазиб олиш ҳажми режага нисбатан 110,4% бажарилди, ўтган йилнинг мос даврига нисбатан 110,3% ўсиш суръати таъминланди.

Сулфид маъданларини 3-сонли гидрометаллургия заводига юклаш ишлари режага нисбатан 106,0% бажарилди ва ўтган йилнинг мос даврига нисбатан 106,5% ўсиш суръати таъминланди.

МАҲАЛЛИЙЛАШТИРИШ – БУГУННИНГ ГАПИ

Қимматбаҳо эҳтиёт қисмларни қайта таъмирлаш корхонанинг иқтисодий самарадорлигига ўзининг ижобий таъсирини кўрсатмай қолмайди. Шу жиҳатдан ҳам  янги эҳтиёт қисмларни сотиб олишга бўлган эҳтиёжни комбинатга қарашли ёрдамчи ташкилотлар ва маҳаллий корхоналар тайёрлаган маҳсулотлар – маҳаллийлаштириш чиғириғидан ўтган, ўзимизнинг шароитга чидамли жиҳозлар билан тўлдиришга эътибор қаратилмоқда. Ҳамкорлик доирасида жорий йилда ТАД-9 УХЛ-2 русумли тортиш электродвигателларини Шимолий кон бошқармаси ва Навоий машинасозлик заводи ҳамда “Navoiyelektroremont” МЧЖ ва “Elmash” МЧЖлар шароитларида қайта таъмирланди.  Пировардида  19880,0 млн. сўм маблағ  иқтисод қилишга эришилди.

Аҳамиятлиси, ГСТ-700-8-УХЛ2 русумли синхрон тортиш генераторлари ўзимизда – электр жиҳозларини таъмирлаш участкасида қайта таъмирланди. Натижада иқтисодий самарадорликка эришилиб,  8060,0 млн. сўм пул иқтисод қилинди.

Кон бошқармасида маҳаллийлаштириш дастури доирасидаги ишларни таҳлил қиладиган бўлсак, 2023 йилда 6.8 млрд сўмлик маҳсулот ишлаб чиқарилган бўлса, 2024 йилда бу кўрсаткич 9.9 млрд сўмни ташкил этди. 2025 йилда яна 16 та лойиҳа асосида 1284 дона, 22.2 млрд сўмлик  маҳсулот ишлаб чиқариш режалаштирилган. Умуман  даврнинг ўзи биздан аждодларимизнинг ҳаёт сабоғида синалган  “Тежоғлик иш – бежоғлик иш” ҳикмати асосида яшаш ва ишлашни талаб этмоқда.

Кузатаётган йилда ҳам кон бошқармасининг ҳар бир тармоғи хусусан, ёқилғи-мойлаш материаллари ва эҳтиёт қисмларни тежаш ҳисобидан таннархни камайтириш эвазига 120,7 млрд сўм маблағ  иқтисод  қилинди.

Мобил мой тарқатиш контейнери харид килиниши эса автоағдаргичларнинг мой алмаштириш жараёнини тезлаштирди. Бу  вақтни тежашга ҳамда 1200 млн. сўм иқтисодий самарадорликка эришиш имконини берди.

ЯШИЛ ИҚТИСОДИЁТ, ЯШИЛ МАКОН –  ДОЛЗАРБ  ВАЗИФА

Энерготежамкорлик борасида  йил давомида “Ишлаб чиқариш ва ижтимоий соҳа объектларида қайта тикланувчи энергия манбааларини кенг жорий этиш чора-тадбирлари”га мувофиқ, кон бошқармаси бўлинмаларида жами 728 дона вакуумли, 10 дона маиший “гелио коллектор” қуёш нуридан қайта тикланувчи электр манбалари қуриб ишга туширилди. Жорий йил май-октябр ойларида умумий ҳисобда 86 819 м3 табиий газни яъни, ишлаб чиқарилаётган маҳсулотнинг таннархига нисбатан 156 274 200 сўм маблағ  тежашга эришилди.

Бундан ташқари,  янги йилнинг номланишидан келиб чиқиб, қолаверса атроф-муҳитни муҳофаза қилишга асосий эътиборни қаратган ҳолда  3-сонли гидрометаллургия заводининг куйдириш, қуритиш ва филтрлаш цехида мониторинг станцияси ўрнатилди. Автоматик мониторинг станциясининг асосий вазифаси  атмосферага чиқарилаётган ифлослантирувчи ташламаларни таҳлил қилишдан иборатдир.

“Яшил макон” умуммиллий дастури доирасида “Шарқий”, “Даугизтау” конлари, Автомобил транспорти бошқармаси, Марказий физика-кимёвий лабораторияси, Тармоқлар ва подстанциялар цехи ҳудудларида ва бўлинмаларда қарийб, 5 гектардан ортиқ ер ўзлаштирилиб, яшил белбоғлар барпо этилган. Ҳашар йўли билан мураккаб чўл табиатига мос 35 000 дона дарахт кўчатлари  ўтқазилди.

ЁШЛАР – ҲАР СОҲАДА ПЕШҚАДАМ

 Яна бир муҳим мавзу,  малакали устоз-ходимларнинг келажак учун муносиб давомчилар тайёрлаётганлигига тўхталмасам бўлмас. Албатта, ШКБнинг қудрати ёш мутахассисларнинг  тафаккури ва билагидадир! Улар ҳар соҳада – илм, инновация, технология, спорт ва санъатда илғор, пешқадам, ташкилий масалаларда ишчан ва меҳнаткаш.

Бугун 2544 нафар ёшлар меҳнат қилаётган корхонада шуури уйғоқ ёшларнинг  борлиги бизнинг энг катта ютуғимиз. Уларнинг  жиҳозлар конструкциясини ўзгартириш ёки ишлаб чиқариш технологияси учун техник ечим, меҳнат унумдорлигини оширишга қаратилган хом - ашё, ёқилғи-энергетика ва бошқа ресурсларни тежашга доир  рационализаторлик таклифлари қабул қилинган. Ишлаб чиқаришга тадбиқ этилган мазкур таклифлар корхонага иқтисодий самара олиб келаётганлиги боис  ғоя муаллифлари молиявий рағбатлантирилди.

Ҳа, корхона ёшларининг истиқболи учун ғамхўрлик қилиш режа-мақсадларнинг асосини ташкил этади. Шу маънода, 84 нафар ёшлар республика малака ошириш олий таълим муассасаларида, 11 нафари Комбинат ўқув марказида малакасини оширди ёки қайта тайёрлов курсларида ўқиди. 570 нафар ўрта-махсус маълумотли ёшлар олийгоҳларда  сиртдан таҳсил олмоқда. 35 нафар ёш истиқболли ходимларнинг олий таълимдаги ўқиши учун молиявий маблағ ажратилган. 2 нафарига  тавсиянома берилган.

Корхона ёшлари учун ишлаб чиқариш экскурсиялари, Республикамизнинг тарихий ва диққатга сазовор манзилларига саёҳатлар ташкиллаштирилган. Интеллектуал ўйинлар,  спорт ва маданий тадбирлар мунтазам ташкил этилаётир. Яна бир эътибор бериладиган жиҳат, ёшлар  зиёратгоҳлар, муқаддас қадамжолар, “Яшил макон” умуммиллий дастури доирасида уюштириладиган ҳашарларда ҳам фаол иштирок этмоқдалар.

ИНСОНГА ЭЪТИБОР – БОШ ВАЗИФА

Юртбошимизнинг 2024 йил 23 сентябрдаги “Камбағалликни қисқартириш ва аҳоли турмуш фаровонлигини ошириш борасидаги чора-тадбирларни янги босқичга олиб чиқиш тўғрисида”ги 143-сон Фармонига мувофиқ,  аҳоли турмуш фаровонлигини яхшилаш мақсадида, 2024 йилда камбағалликни қисқартириш ва бандликка кўмаклашиш туман бўлими томонидан йўналтирилган қабул квоталари орқали 120 нафар ижтимоий ҳимояга мухтож фуқаролар ишга қабул қилинган. Аксарияти амалиёти билан ўқув  курси комбинатида ўқитилиб,  иккинчи касбга йўналтирилган.

Бундан ташқари, Навоий давлат кончилик ва технологиялар университети, Тошкент давлат техника университети, Тошкент давлат транспорт университетининг 120 нафар битирувчиларининг ҳам бандлиги таъминланган.

Ўзбекистон Республикасининг янги таҳрирдаги “Жисмоний ва юридик шахсларнинг мурожаатлари тўғрисида”ги Қонуни ҳамда, “НКМК” АЖнинг соҳавий буйруқлари талаблари асосида жисмоний ва юридик шахсларнинг ариза ва шикоятларида ўз аксини топган масалаларни ҳал этиш, уларнинг ҳуқуқлари ва қонуний манфаатларини ҳимоя қилиш борасида ҳам муайян ишлар амалга оширилмоқда.

Ҳар чоракда бир марта ўтказилаётган фуқаролар қабули фикримизнинг ёрқин далилидир. Хусусан, жисмоний ва юридик шахслардан жами 688 та мурожаат  келиб тушган  ва  ҳал этилган.

РАҒБАТ – МЕҲНАТГА УНДАЙДИ

Касаба уюшма қўмиталари кучли ижтимоий ҳимоя борасида  инсон ҳуқуқ ва манфаатларини таъминлашда етакчи бўлган халқчил ташкилотдир. Бу йўналишда 1-сонли Бирлашган касаба уюшма қўмитаси ходимларнинг касбий, меҳнатга оид, ижтимоий-иқтисодий ҳуқуқ ва манфаатларини таъминлашда ишончли ҳамкор.

Шунингдек, меҳнат муҳофазаси ва техника хавфсизлиги қоидаларига риоя қилиниши, меҳнат шароитларини яхшилаш, эҳтиёжманд ва ёрдамга муҳтожларни қўллаб-қувватлашда фаол иштирок этмоқда. Спорт ва маданият, ижтимоий-маърифий жараёнларда, ёшлар иштирокидаги тадбирлар уларнинг иштирокисиз ўтмайди.

Ишчи-хизматчиларни соғломлаштириш учун  турли сиҳатгоҳ ва дам олиш масканларига йўлланмалар берилиб, “Ўзбекистон бўйлаб саёҳат қил!” лойиҳасида туристик саёҳатлар ташкил этилган. Бу каби мазмунли ҳордиқ ва эътибор уларни шижоат билан меҳнат қилишга, янги-янги мақсадлар сари улкан режалар тузишга рағбат бериши шубҳасиз!.

ХУЛОСА ЎРНИДА...

Кузатаётган йилимизни таҳлил этиб, ҳазрат Навоийнинг “Эмас осон бу майдон ичра турмоқ”, сатрларини эслайман. Бу йўлда, йиллар давомида ишлаб чиқариш синовларида саботи пишган жонкуяр, юрт эртаси учун суяги симиллайдиган мутахассислар, саноат чиғириқларида тажриба йиққан муҳандис-техник ходимлар, мураккаб чўл табиатида иродаси букилмаган қаҳрамон ишчилар шараф билан меҳнат қилаётир.

Янги – 2025 йилга ҳам олдимизга катта мақсадлар қўйганмиз, кўзланган марранинг кўлами кенг, залвори улуғвор! Эришилажак довонга қарасак, бошдан дўппи тушгудек  бироқ, Ватан кутаётган жасорат,  раҳбарият билдирган ишонч, жамоани  бу йўлда олға боришга, “НКМК” АЖ Бошқаруви раиси – Бош директори Қувондиқ Санақулов таъкидлаганидек, илмий, асосланган ҳолда меҳнат қилишга, ҳар бир ишга қатъият ва масъуллик ҳисси, яратувчанлик ғоялари билан ёндошишга ундайди.

Бир сўз билан айтганда, атроф-муҳитни асраш ва “яшил” иқтисодиёт” йилида катта ва аҳил  жамоа билан биргаликда олдимизга қўйилган юксак вазифаларни бажаришга шаймиз! Юрт ишига идрокимиз, қудратимиз ва тажрибамизни сафарбар қилганмиз!.  

    Ҳурматли Президентимиз Шавкат Мирзиёев таъкидлаганидек, “Бизнинг асосий мақсадимиз — ёшларнинг сифатли таълим олиш имкониятига эга бўлишига эришиш, уларнинг ўз қобилияти ва истеъдодини рўёбга чиқариш учун барча зарур шарт-шароитларни яратиб беришдан иборат”.
Ушбу фикрлар тасдиғи ўлароқ, энг чекка ҳудуд Учқудуқ туманида ҳам фар¬зандларимиз таълим–тарбия оладиган масканларда энг аввало, шарт–шароитни яхшилаш йўлида изчил ишлар амалга оширилмоқда.
    Бир йил сарҳисобига назар ташлайдиган бўлсак, 3,9- мактабларда 14 млрд. 18 млн. сўм маблағ эвазига капитал таъмирлаш ишлари олиб борилди. Мутлақо янги кўринишга келтирилган ўқув даргоҳлари янги ўқув йилида ўқувчиларни бағрига олди.
“Ташаббусли бюджет”нинг 2024 йил 1-мавсуми ғолиб лойиҳалари қаторида 7- мактабда 311 млн. сўм, 18- мактабда 310 млн. сўм ҳисобидан сунъий қопламали спорт майдончаси қурилиб фойдаланишга топширилган. 18-мактаб ҳудуди ички йўлакларига 600 млн. сўмга асфальт ётқизиш ишлари олиб борилди.
Шунингдек, 20-мактабнинг 280 ўринли қўшимча биноси ҳам 1-мавсум лойиҳаси бўлиб, 1 млрд. 224 млн. сўм маблағ сарфланган. Икки қаватли янги бинода 7 та синф хонаси замонавий дизайн ва ўзгача услубда қурилган. Кенг ва ёруғ коридорда ўқувчиларнинг устки кийимлари учун шкафлар қўйилгани нафақат болаларни балки ота-оналарни ҳам беҳад қувонтирмоқда.
    Шу кеча-кундузда 1 млрд. 178,2 млн. сўм пул ҳисобига “Йўлчилар” овулидаги 11-сонли ДМТТ биносида таъмирлаш ишларига якунига етказилмоқда.
Худди шундай, “Ташаббусли бюджет”нинг 2024 йил 2-мавсуми ғолиблар сафида “Жузқудуқ” овулидаги 2-мактабда 400 млн. сўмга сунъий қопламали мини стадион қурилаётган бўлса, 18-мактабнинг фасад қисмида 600 млн. сўмлик таъмирлаш ишлари олиб борилаётир.
20-мактабнинг фасад қисми эса 1 млрд. 360 млн. сўмга таъмирланмоқда. Ушбу қурилишлар яқин кунларда якунланиб, объектларни фойдаланишга топшириш мақсад қилинган.
    Учқудуқ туманида амалга оширилаётган бу каби эзгу ишларнинг барчаси ўқувчи-ёшларнинг сифатли таълим-тарбия олишига қаратилганганлиги билан ҳам аҳамиятлидир.

      Мамлакат уран хом ашё базасини ривожлантириш ва қайта тўлдириш, мавжуд саноат корхоналарининг уран маъданига бўлган эҳтиёжини тўла қоплашга доир олиб борилаётган ишлар эътиборга молик. Бунда “Навоийуран ДК” уран ва ноёб металлар геологияси илмий ишлаб - чиқариш маркази “Бохантау” геология қидирув экспедициясининг ҳам салмоқли улуши бор.
    Корхона тарихи узоқ йилларга бориб тақалади. Экспедеция 1979 йилда ташкил этилган. Бугун “Бохантау” геология қидирув экспедицияси марказий Қизилқум саҳросида Бокантау ва Тамдитау атрофларида уран қумтошли турини қидириш ва излаш ишларини олиб бормоқда. Кўплаб янги истиқболли уран конларини излаб топишда геолог ва геофизикларнинг ҳиссаси катта албатта.
Айни пайтда корхонада 10 та бурғилаш қурилмаси бор. Улар ёрдамида Қизиқоқ, Жасаға, Зиёкон, Мингбой, Учқудуқ, Муллали, Ақберди ва Нурафшон майдонларида жами 214 549 метр бурғилаш ишлари амалга оширилди. Ўтган 2023 йилга нисбатан ўсиш 7,03 фоизни ташкил этган. Иккита Женгелди ва Оқтоғ конлари давлат захиралари комиссиясига топширилди. Ҳозирда ушбу конларни ўзлаштириш ишлари бошлаб юборилган.
Экспедицияда меҳнат қилаётган 299 нафар ходимдан 21 нафари аёллардан иборат. Уларнинг 65 нафарини муҳандис - техник ходимларни ташкил этади. 38 нафари олий маълумотли.
“Бохантау” ГҚЭ бўлинмаларида меҳнат қилаётганларнинг барчаси касаба уюшмаси аъзолари ҳисобланади. Меҳнат муҳофазаси, хавфсизлик техникаси ва саноат хавфсизлиги бўйича мунтазам ўрганишлар олиб борилиб, 415 банддан иборат ёзма кўрсатмалар расмийлаштирилган.
Албатта, ходимнинг иш унуми унинг кайфиятига унга кўрсатилаётган ғамхўрликка кўп жиҳатдан боғлиқ. Ишчи-хизматчилар манфаатини ҳар томонлама ҳимоя қилиш бунда уларнинг қулай меҳнат шароитларида ишлашини назорага олиш оила аъзолари ва фарзандларини соғломлаштириш касаба қўмитанинг бош вазифасидир.
     Рақамларни таҳлил қиладиган бўлсак, 43 млн. сўм маблағ эвазига бурғилаш қурилмаси ёнидаги 3 та дам олиш вагонига кондиционер ва музлатгичлар қўйилди. 10 та микротўлқинли печ, 10 та электр плиталари ва чой қайнатиш жиҳозлари билан таъминланган.
Байрамлар арафасида 14 нафар нафақада бўлган нуронийлар ва ижтимоий-тиббий кўмакка муҳтож ишчи-ходимлар қадрланиб, улар ҳолидан хабар олинади. Озиқ-овқат маҳсулотлар тўплами берилди, қарийб, 52 млн. сўм миқдорида моддий кўмак кўрсатилди. 60 нафарига “Кончи”, “Металлург”, “Нуробод” ва бошқа санаторий-профилакторийларга йўлланмалар тақдим этилган бўлса 101 нафар болажон “Сармиш”, “Келажак”, “Болажон”, “Геолог” сингари ёзги соғломлаштириш оромгоҳларида ҳордиқ чиқаришди.
   “Ўзбекистон бўйлаб саёҳат, қил!” дастури доирасида Шаҳрисабз, Бухоро ва Самарқанднинг диққатга сазовор жойларини томоша қилишди. 8 март, “Наврўз” ва мустақиллик байрами арафасида турли маънавий-маърифий тадбирлар, спорт мусобақалари ташкил этилиб, фаол иштирокчилар ва совриндорлар рағбатлантирилмоқда.
    Дарвоқе, яна бир йил ортда қолаяпти, тарихга муҳрланяпти. Кузатаётган йилни таҳлил қилларканмиз Янги йилда янги эзгу ишларни режалаштиряпмиз. Қизилқумнинг ёзи жуда иссиқ, қиши эса қаттиқ совуқдан иборат аёвсиз иқлимини писанд этмай, мамлакатимиз иқтисодиёти учун улкан аҳамиятга эга фойдали уран қазилма конларини разведка қилиш, излаб топиш ишларини олиб бораётган забардаст геологларга мустаҳкам соғлик, Янги йилда янги зафарлар ёр бўлишини, тилаб қоламан.

Дилшод ҲУСАНОВ,
“Бохантау” ГҚЭ бошлиғи.

Мана, Янги йилни у умрида илк марта пойтахтда нишонлайдиган бўлди. Дарвоқе, ўзи туғилган шаҳарчадаги банкларнинг бирида анча йил ишлаб, хизматни ҳам ўринлатгани боис, унга миннатдорлик тариқасида байрам кунларида пойтахтга 3 кунлик саёҳат йўлланмаси берилди. Шу боис у бу ерга келиб, банд қилинган тўрт юлдузли меҳмонхонага жойлашди-ки, кўҳна лекин байрам муносабати билан ўзгача тароват касб этган шаҳарнинг ҳар турли жозиб пучмоқлари-ю хилват гўшаларидан ҳам кўриниб турарди.
- Кошки, бу гал Янги йил кечаси тамоман ўзгача бўлса, янада файзли, янада фусункор бўлса... дея хитоб қилди у бир пайт тун оғушидаги улкан шаҳарга завқланиб боқаркан. Шу йўсин Хадича энтикиб қўйди-да, байрам кунига кўчага айланишга кияман, дея ўзи билан олиб келган кийимларини бир-бир кўздан кечирди.
Эртасига эса ўзининг «қатъий ҳаракат режа»сига асосан эрталабдан ота-онасига яқинларига қўнғироқ қилиб, байрам билан барчани қутлади. Ҳозирча шаҳардан олган таассуротларию, ўзидан анча ёш лекин шаддодгина Нилуфар ҳақида онасига сўзлаб берди.
Дарвоқе, Нилуфар олийгоҳни тугаллаб, банкда иш бошлаганига кўп бўлмади. Тиришқоқ, киришимли, ахборот технологияларини пухта ўзлаштирган боз устига камида уч тилда равон сўзлайдиган бу қиз жамоадошлар билан тезда қадрдонлашиб кетди. Гарчи Хадича ўз ишининг устаси, соҳага доир янгиликларни тезда илғаб, ишини пишиқ-пухта бажарса-да, ҳамкасбининг тамоман акси бўлиб, у билан иш юзасидангина муомала қилар эди.
Саёҳат учун йўлланмани банк бўйича фақат иккаласига берилаётганини эшитган Хадичанинг энсаси қотди, бирмунча хафа бўлгандай бўлди. Яна бунга эътибор бермасликка ҳаракат қилди: “Нари борса курсдошим Ҳамрохонни топиб оламан, шаҳарни бирга айланамиз, бирор жойда тамадди ҳам қилармиз” деб кўнглидан ўтказиб қўйди.
Деразадан ташқарини кузатар экан, паға-паға бўлиб ёғаётган қор, борлиқни чулғаган оқлик қачонлардир сўнган эсада, ҳали-ҳануз унут бўлмаган севгисининг хирагина тажассуми қалбининг туб-тубида юз кўрсатди.
Аслида, Хадича ўзининг меҳр-муҳаббат туйғусига ташна эканлигини билса ҳам тушкунликка, ғам-ғуссага сира берилмас, шу боис бутун борлиғини қатъияту иштиёқла касб-корига бахш этиб, ўзи учун мустақил бир ҳаётни қуришга эришганди. Дугоналару сайр-саёҳатларга, шунингдек, турли давралар-у, тўй-ҳашамларга унчалик ҳуши йўқ тўғрироғи эса муҳтож эмас эди.
-Опажон, ассалому алайкум! Юзидаги кулгучлари ўзига ярашган овозидан қувноқлик сезилиб турган Нилуфар эшикни тақиллатиб кириб келди.
Энди ҳамкасбидаги кайфият Хадичага “юқди”. Очиқюзлилик билан азму пойтахтнинг диққатга сазовор қайси жойларига боришларини келишиб, сўнгра йўлга чиқишди.
Дарҳақиқат, йилнинг айни шу сўнгги кунларида йўловчиларнинг ўтиб-қайтиши-ю, машиналар қатновидаги тезлик, шиддат ҳам ақлбовар этмас даражада эди. Ҳар бирининг юрагида йилнинг сўнгги куни тамоман ўзгача яна ҳам тароватли, яна ҳам фусункор бўлсин-да, деган ўй-фикр яширин, гўё!.
Мафтункор шаҳарнинг бетакрор масканларию мўъжизаларини томоша қила-қила ҳолда тойишган эди. Тушликда емак истаб яхши тамаддихона излаган Хадича Ҳамрохонга телефон қилди. Гўшакдан водийча лутф ила: “Хадича жоним, қачон келдингиз, нимага бир хабарлашмадингиз, тўғри уйга келавермабсиз-да” курсдош дугонасининг қадрдон овози эшитилди.
Улар учрашишди. Курсдошлари ҳақидаги билган-эшитган маълумотлари билан бўлишишди айниқса, Абдуғаффор ҳақидаги суҳбат ўз-ўзидан чўзилиб кетди. Ҳамрохон у билан молия ташкилотида бирга ишлайди. Абдуғаффорнинг тўйи, ўғли ва хотининнг вафоти ҳақида сўзлаб берди. Бу сафар дугонасининг сўзларини бўлмай диққат билан эшитган Хадича кўз ёшларини Нилуфарга кўрсатмаслик учун “ҳозир” дея ўрнидан туриб кетди.
-Қайсарлик қилмай, Абдуғаффор билан гаплашиб кўринг. У ҳали-ҳануз сизни кўп эслайди, - деди аёллар хонасига кириб келган Ҳамрохон.
Ойнадаги аксига узоқ термулиб қолган Хадича қачонлардир ловуллаган бу аланга тафтидан куйиб кул бўлишдан қўрқиб, юрагининг энг тубига яширган чўғ яна йилтиллай бошлаган эди.
Тамаддихонадан чиқиб, узоқлашиб бораётган Ҳамрохондан кўз узмаган Хадича яна ўзи қобиғига ўралган ҳолда ўй-хаёллари билан ёлғиб қолган эди.
Энг катта арча ўрнатилган майдонга боришганда ҳам ул-бул харид қилиш учун супермаркетга киришганда ҳам Нилуфарни бирор бир гапи қулоғига кирмади. Тўғрироғи, унинг фикри-ёди бундан 10 йил олдин ўтган воқе-ҳодисалар билан банд эди...
Меҳмонхонага қайтаркан, кираверишда администраторга йўлиқди.
-Опажон, бу гуллар сизга, - деди-ю, ифори бутун фойени тутиб кетган бир гулдастани унинг қўлига тутқазди. Айтганча, ўша гулдаста ичида қип-қизил атиргуллардан ташкари бир мактуб ҳам бор экан.
-Буни гул сотувчи дўкондан куръер бериб кетди. Менга фақат уни олганингиз учун имзо қўйдириш қолди, холос.
Хадича юраги ҳаприққанча гулдастани оларкан, унда ўз исмини ўқиди ҳа, ҳа, бу айнан унга аталган. Шунда у довдираб, бир муддат ҳаракатсиз қолди.
- Опажон, нима бўлди? Буларни оласизми ё қайтариб юборайинми?
- Йўқ, йўқ, уларни оламан, оламан..... Лифт кетиб қолмасин.
Шундан сўнг у хонага кирди-да, сув идиши қаршисида чўкканча ҳалиги гулларга боққан кўйи ўйланиб қолди. Шу гуллар орасига қистирилган бояги мактубни ўқишга эса ботинолмай турди. Одатда, туғилган кунида банкдаги ҳамкасблари унга гул юборишарди. Лекин бошқалардан ҳам шундай совғани олганмиди-йўқми, ҳозир эслолмади.
Хадича бир қултум сув ичди-ю, ниҳоят хатжилдни очди. Буни қарангки, уни шаҳардаги манаман деган ресторанлардан бирига кечликка таклиф қилишибди. Айни шу оқшом соат ўнда. Хатга «Бобурбек» деб ёзилган. Фамилия эса ёзилмаган. Шунда у ҳаяжон ичра қавму қариндошлари, синфдошу курсдош дўстлари, таниш-билишларини бирма-бир ўйлади. Лекин уларнинг орасида Бобурбек, дегани йўқ эди.
Хадича маъюс тортиб қолди. Хўш, энди нима қилади. Ҳамрохонга нима дейди, Янги йилни Нилуфар учаласи бирга кутиб олмоқчи эди-ку?! Шу пайт эшик қўнғироғи чалиниб, ўй-хаёллари бўлинди. Ҳафсаласиз бориб эшикни очди. Ўша шаддод Нилуфар қаршисида турарди.
Худди унинг қалбидаги ғалаёнлардан хабардордай: – Опажон, гулдастани берган киши сизга бефарқ эмас экан, бўлмаса бугунгидай Янги йил остонасида сизни йўқламас эди.
Хадича ортиқ иккиланмай, телефон гўшагини кўтарди-да, Ҳамрохонга қўнғироқ қилиб, нафаси бўғзига тиқилганча деди: - Қадрдоним биласизми, мени кечки овқатга таклиф қилишибди. Сира кутмагандим. Шуни сизга билдириш учун телефон қилаётувдим. Лекин унинг кимлигини билмайман, қандай бораман, ким бўлиши мумкин?!
-Азизам, гўзалим! Сизнинг ўрнингизда бўлганимда албатта борардим-кўрардим. Етар, қадрлигим шунча йил, шунча вақт атрофингизни баланд девор билан ўраб олганингиз. Чегараларни бузиш вақти аллақачон келди.
Нилуфар кўмагида тамоман ўзга хил тайёргарлик ишларига киришиб кетди. Либос танлаш, турли буюмлар... такси чақириш...
Соат ўндан ўтганда эса Хадича бироз ҳадик, истиҳола ва ҳаяжон билан ресторан бўсағасида турар эди. Сертакаллуф бир хизматчи уни қарши олди-да, ичкарига таклиф этди. Шу чоғ орқада бир киши кўринди навозишу назокатли, табассуми андак хижолат, андак айбдорлик ҳисси-ла йўғрилган... аммо суруру хушбахтлик туйғусига чулғанган киши.
- Хадича, келганингиздан хурсандман. Рахмат
Шунда орага ўнғайсиз бир жимлик чўкди.
- Назаримда мени бошқа киши таклиф қилганди бу ерга.
-Хадича, сизга айтадиган гапларим кўп. Қани, ўтирайлик-чи.
Шундай қилиб, у-бу нарса буюртма бергандай бўлишди. Абдуғаффор кечмишидан сўзлай кетди... Олийгоҳдан кейинги ҳаёти, пойтахтда қолиб ишлаётгани, ўғиллик бўлгани, автоҳалокат туфайли хотинининг вафоти ҳакида... Ниҳоят, гал шунга келиб тақалди:
- Бирга ўқиган вақтимизда сизга қаттиқ боғланиб қолгандим, Хадича!. Онам холам билан аҳдлашиб қўйганлиги сабабидан сизга юрагимни очолмадим. Журъатсизлик қилдим.
....
-Ҳамрохоннинг қўнғироғидан юрагимда умид йилтиллади. Сиз билан гаплашишга, сизни шу ерга чақиришга чоғландим, аммо рад жавоби олишдан қўрққаним учун худди шу бирмунча сирлироқ усулни маъқул кўрдим.
- Борди-ю, келмасам нима бўларди? Ахир, таклифни “Бобурбек”дан олдим-ку?!
- Мени кечиринг. Сизни яна топганимдан шунчалар бахтиёрманки... Сизни яна йўқотишни истамайман...
- Шунча йилдан кейин...
Шу он ҳис-туйғулар залвори остида бир муддат жим қолишди.
4-5 ёшлардаги кўзлари мунчоқ сочлари қўнғироқ болакай югуриб келиб Абдуғаффорни қучоғига сингиб кетди. Ҳамрохон ва Нилуфарни бу ерда учратаман, деб ўйламаган Хадича саросима ичида: “Бу нима қилганингиз, ахир!” ҳайратини яширолмади. Анча-мунча хафа бўлганидан юзларига қизиллик югуриб, икки қошини ўртасида билинар-билинмас кўндаланг чизиқ кўринди.
-Хадича сизни бу ерга чақирган тойчоқни исми Бобурбек бўлади, - деди ташаббусни қўлга олишга уринган Абдуғаффор орадаги ўнғайсизликни аритиш учун ўғлини таништириб.
Хуллас, бу галги янги йил кечаси тамоман ўзгача, янада гўзал, фусункор бўлди, ҳайрату умидлар кечаси бўлди. Янги йил янги кунда ўттиз ёшгача кутгани Хадичанинг эшигини тақиллаб, БАХТ - “Бобурбек” исми билан кириб келди.
Ҳа, биз ҳаётдан, сўраган нарсамизни оламиз... Хадича ҳаётнинг гўзал эканлигига ишона бошлагани сари унинг умр йўллари гўзаллаша борди. Бир-биридан яхши хабарлар эшитиб, кўплаб яхши воқеалар унинг ҳаётида рўй берди. Кўп куттирмай Бобурбекнинг қаторига жажжи Улуғбек қўшилди.

Райхон ҚОДИРОВА, журналист.

      Аҳоли саломатлигини муҳофаза қилиш ва мустаҳкамлаш масаласига давлат сиёсати даражасида эътибор қаратилаётгани бежиз эмас. Зеро, халқ саломатлиги, миллат генофонди мустаҳкамлиги шу юртнинг катта бойлиги саналади.

      Бугун соғлиқни сақлаш тизимида олиб борилаётган туб ислоҳотлар ана шундай тамойил ва юксак мақсадга қаратилган. Бу эзгу ишлар энг чекка ҳудуд Учқудуқда ҳам ўз инъикосини бераётир.  Туман тиббиёт бирлашмаси  ва “НКМК жамғармаси” ДМ “Учқудуқ” ҲБ № 2-тиббий санитария қисми тиббиёт ходимлари қарийб, қирқ минг нафар аҳолига хизмат кўрсатмоқда.

     -Ҳозирда асосий эътибор, муассаса моддий-техника базасини яхшилашга қаратилган.  НКМК маблағлари ҳисобидан маънан эскирган  тиббий асбоб-ускуналар босқичма – босқич  янгиланмоқда. Эътиборлиси, уларнинг аксарияти юқори технологияли тиббий ускуналарга алмаштирилмоқда. Бу эса беморларни қисқа вақт ичида текшириш, аниқ ташхислаш ва ўз вақтида даволаш имконини бермоқда, - дейди №2-ТСҚ бошлиғи Эркин Нормуродов.

      Чақалоқларга сунъий нафас бериш, муддатидан олдин оғир туғилган чақалоқлар учун кувэз ускунаси, янги туғилган чақалоқларнинг эшитиш қобилиятини аниқлаш, кардиомонитор, жарроҳлик ва наркоз қурилмаси, портатив рентген аппарати,  флюорография ҳамда офтальмологик ускуна, стерилизатор ва аквадистиллатор каби тиббий жиҳозлар шулар жумласидандир. Албатта,  сўнгги русумдаги ушбу тиббий жиҳозлар халқаро стандартларга мувофиқ тиббий ёрдам кўрсатиш ишларини ташкил этишда қўл келмоқда.

      Шунингдек, муассасанинг стоматология поликлиникаси капитал таъмирдан чиқарилган мутлақо янги бинога жойлаштирилди. Бу ерда яратилган шарт-шароитлардан беморлар ҳам  хизмат кўрсатаётган тиббиёт ходимлари ҳам мамнун.  Эътиборлиси, шу кеча-кундузда  катталар поликлиникаси ва туғруқхона бўлимларида капитал таъмирлаш ишлари олиб борилмоқда.

      Умуман олганда, тиббиёт муассасасининг барча бўлимлари жойлашган биноларда капитал-қурилиш ишлари 2025 йилда давом эттирилади.

Туман тиббиёт бирлашмаси йил сарҳисобига тўхталадиган бўлсак, бу ерда ҳам муассаса моддий - техник базасини яхшилашга аҳолига сифатли тиббий хизмат кўрсатишга алоҳида эътибор қаратилаётир.

-“Ташаббусли бюджет” лойиҳаси доирасида ажратилган маблағлар ҳисобидан  биполяр учлик ва пицетли электрокогулятор тўплами, катта жаррлҳлиқ тўплами, жарроҳлиқ столи, амалиётхона ёритгич рефлекторлари, кардиомониторлар ҳамда республика шифохоналарида саноқли бўлган лапараскоп аппарати харид қилинган, - деди ТТБ бошлиғи Хуршид Шукуров.

     Ҳозирда 500 млн. сўм маблағ эвазига кўп тармоқли туман поликлиникаси қайдхона бўлимини кенгайтириш мақсадида қурилиш ишлари олиб борилмоқда.

      Соҳада янги тиббий ускуналар ва технологияларнинг жорий этилиши, ҳар бир инсон учун зарур ва тезкор тиббий ёрдамни амалга ошириш мақсад қилинган.

    Умумий ўрта таълим мактаблари ўқувчиларининг ижодий ва техник қобилиятларини ривожлантириш, уларнинг бўш вақтларини мазмунли ўтказиш ва касбга йўналтириш – бугунги кун таълим тизимининг устувор вазифаларидан бири саналади. "Баркамол авлод" болалар мактаблари ҳам айни мақсадларни кўзлаб фаолият олиб бормоқда.

      Туманимиздаги “Баркамол авлод” болалар мактабида ҳам ёшларнинг ижодий кўникмаларини юксалтириш, турли соҳалардаги қизиқишларини қўллаб-қувватлаш ҳамда уларни интеллектуал баркамол авлод сифатида тарбиялашга алоҳида эътибор қаратилмоқда. Мактабда 7 та йўналиш бўйича  ташкил этилган 19 турдаги тўгараклар фаолияти фикримизнинг ёрқин далилидир. Робототехника, ментал арифметика, ART дизайн, дастурлаш, тасвирий санъат, театр ва спорт тўгараклари шулар жумласидандир. Замонавий тикиш-бичиш хонасида эса қизлар учун ҳунармандчилик сирлари ўргатилмоқда.

      Компьютер саводхонлиги тўгарагида 10 та моноблок компьютерлар ўрнатилган бўлиб, улар юқори тезликдаги интернетга уланган. Бундай имкониятлар ёшларга дастурлаш, 3D дизайн ва бошқа техник соҳаларда билим олишга кенг йўл очмоқда.

      Жорий ўқув йилида мактаб тарбияланувчилари вилоят, республика ва халқаро танловларда фаол иштирок этди. Тасвирий санъат, театр, ментал арифметика ва дастурлаш соҳаларида юқори поғоналарни эгаллади.

      Мактаб биноси 100 ўқувчи ўрнига мўлжалланган бўлиб, 1989 йилда қурилган. Ҳозирда машғулотлар икки сменада олиб борилиб, 420 нафар ўқувчи тўгаракларга жалб қилинган. Шунингдек, мактаблар қошида ҳам турли тўгараклар фаолияти йўлга қўйилган бўлиб, жами 954 нафар ёшлар қамраб олинган.

     Мухтасар айтганда “Баркамол авлод” болалар мактаби – бу нафақат таълим маскани, балки ҳар бир ёшнинг ижодий қонат қоқиши учун тайёрланган мустаҳкам майдон ҳам саналади.

Гулзира Кенжебаева,

“Баркамол авлод” болалар мактаби директори.

Uchquduq tumani

Tuman markazi - Uchquduq shahri.Tumanning tuzilgan vaqti – 1982 yil 22-aprel. Territoriyasi – 4663 ming2 km. Tuman markazi Navoiy viloyati markazigacha bulgan masofa – 300 km. Aholisi - 37028 ming kishi

Qisqacha ma'lumot

Aloqada bo'ling

  Email: This email address is being protected from spambots. You need JavaScript enabled to view it.
  Telefon: (+99879)222-00-05-101
  Telefon: (+99879)222-00-05-102
  Faks: (0436) 593-11-01
  Manzil: Navoiy viloyati, Uchquduq tumani, Amir Temur ko‘chasi, 28-uy

Ijtimoiy tarmoqlarda: